Бишкек мэриясынын жанына административдик имарат курулат
Бишкек шаардык кеңешинин депутаты Эмир Марлисбеков муниципалдык менчик жана жер маселелери боюнча туруктуу комиссиянын жыйынында мэриянын имаратынын жанындагы унаа токтотуучу жайдын аймагында эмне куруларына кызыкты.
Бишкек шаарынын Капиталдык курулуш башкармалыгынын башчысы Эрмек Арымбаев бул жерде жаңы административдик имарат курулуп, анын астына унаа токтотуучу жай (паркинг) жайгаштырылаарын билдирди. Анын айтымында, учурда пландоо жана даярдык иштери жүрүп жатат, бир нече эскиздер бар жана долбоорлоо иштери параллелдүү жүргүзүлүп жатат.
Муниципалдык менчик боюнча туруктуу комиссиянын төрагасынын орун басары Эркин Бахтияров Арымбаевден жаңы курулуштун долбоору али даяр боло элек болсо, мэриянын жанындагы азыркы унаа токтотуучу жай кайсы негизде жабылганын сурады. Ошондой эле ал объект мамлекеттик реестрге катталмайынча унаа токтотуучу жайды ачып туруу керектигин жана параллелдүү долбоорлоого жол берилбеши керектигин белгиледи.
Мындан тышкары, башкармалыктын жетекчисинен жер алдындагы унаа токтотуучу жай көп деңгээлдүү болобу жана курулушка канча каражат каралган деген суроолор берилди. Арымбаев жер алдындагы паркинг эки деңгээлдүү болорун, ал эми курулушка керектелчү каражаттын суммасы азырынча так аныктала электигин айтты.
Депутаттар шаар тургундары жана мекеме кызматкерлери үчүн унаа токтотуучу жайлар жетишсиз болгондуктан, учурдагы паркингди кайрадан ачуу сунушун киргизишти.
