ЖК депутаттары Курулуш министрлигинин ишин иликтөө комиссиясын түзөт
Курулуш тармагындагы көйгөйлөр жана Курулуш министрлигинин ишмердүүлүгү боюнча депутаттар тарабынан айтылган билдирүүлөрдөн кийин, Жогорку Кеңештин транспорт жана коммуникациялар боюнча комитетинин кезексиз жыйынында депутат Кубанычбек Самаков Министрликтин ишин иликтөө үчүн комиссия түзүүнү сунуштады.
Кийинчерээк аталган комиссиянын курамына депутаттар Кубанычбек Самаков, Акылбек Түмөнбаев жана Кубанычек Конгантиев киргени белгилүү болду. Бирок комиссиянын акыркы курамы азырынча тактала элек.
Комиссия түзүү сунушу курулуш компанияларынын жетекчилеринен түшкөн көптөгөн даттануулардын негизинде көтөрүлдү. Алардын айтымында, Курулуш министрлиги өз алдынча бекиткен тарифтер негизсиз болуп, кыймылсыз мүлктүн жана кызмат көрсөтүүлөрдүн баасынын өсүшүнө алып келүүдө. Депутаттар жана ишкер чөйрө бул жагдайды катуу сынга алышууда.
Мындан тышкары, буга чейин депутаттар министрликтин кызматкерлерине төлөнгөн өтө жогорку айлык маяналарга (500 миң сомго чейин) көңүл бурушкан. Бул болсо дарыгерлердин, мугалимдердин жана башка бюджеттик кызматкерлердин айлык маянасы төмөн болуп турган шартта коомчулуктун нааразычылыгын жараткан.
Комиссия Курулуш министрлигинин тарифтик саясатын, тарифтерди бекитүү механизмдерин, алардын турак жай рыногуна тийгизген таасирин жана мыйзамдарга шайкештигин изилдеши керек.
