Парламенттик комитет Таш-Дөбөдөгү илимий-изилдөө институтун оңдоо маселесин көтөрүштү
Жогорку Кеңештин эмгек, саламаттык сактоо, аялдар иштери жана социалдык маселелер боюнча комитетинин мүчөлөрү көчмө жыйындын алкагында Чүй облусунун Таш-Дөбө айылында жайгашкан Кыргыз курортология жана калыбына келтирип дарылоо илимий-изилдөө институтунун ишмердүүлүгү менен таанышты.
Жогорку Кеңештин басма сөз кызматы билдиргендей, депутаттар институттун негизги көйгөйлөрүн угушту.
"Дарылоо мекемесинин имараты 1984-жылы курулган жана ошондон бери капиталдык оңдоп-түзөөдөн өткөн эмес. Буга карабастан, мекеме ишин улантып, жыл сайын өлкөнүн ар кайсы аймактарынан келген орто эсеп менен 13 миңге жакын бейтапты кабыл алууда. Депутат Гүлнара Баатырова институттун коом үчүн маанилүү ролун белгилеп, бейтаптар үчүн ыңгайлуу жана жеткиликтүү шарттарды түзүүнүн зарылдыгын айтты. Анын пикиринде, өзгөчө баатыр энелерди акысыз дарылоо маселесине көңүл буруу керек", — деп айтылат маалыматта.
Ошондой эле депутат Гулкан Молдобекова тамак-ашка каралган учурдагы каржылоо жетишсиз экенин белгилеп, аны көбөйтүү зарылдыгын билдирди.
Комитеттин мүчөлөрү Саламаттык сактоо министрлигине институтту заманбап жабдуулар менен камсыз кылуу, имаратты оңдоп-түзөөдөн өткөрүү, кызмат көрсөтүүлөрдүн сапатын жакшыртуу жана кызматкерлердин айлык маянасын жогорулатуу боюнча чараларды көрүүнү сунушташты.
