Былтыр жер казынасын пайдалануу активдери 1,6 млн долларга сатылган
2025-жылдан бери жер казынасын пайдалануу укугуна 26 аукцион өткөрүлүп, алардын жыйынтыгында активдер болжол менен 1,6 млн долларга сатылганын "B5+1" форматындагы эки күндүк бизнес-форумдун алкагында өткөн бизнес- жолугушууда Эл аралык ишкерлер кеңеши билдирди.
Кеңештин маалыматына ылайык, 2025-жылдын сентябрь айына карата жер казынасын пайдаланууга 2005 лицензия берилген. Анын ичинен 103 лицензия мамлекеттин 100%дык катышуусундагы мамлекеттик ишканаларга тиешелүү.
Мамлекеттик корлор балансындагы маалыматтарга ылайык, Кыргызстан аймагында 51 түрдөгү минералдык чийки зат боюнча, анын ичинде алтын, күмүш, жез, сурьма, вольфрам жана сейрек кездешүүчү жер элементтерин камтыган 1020дан ашуун кен жай жана минералдык көрүнүштөр катталган. Ошондой эле ресурстары тастыкталган же келечектүү деп саналган 22 критикалык минералдын тизмеси түзүлгөн.
Тоокен тармагындагы инвестициялык динамикага өзгөчө көңүл бурулду. 2025-жылдын январь–сентябрь айларынын жыйынтыгы боюнча пайдалуу кендерди казуу тармагына тартылган түз чет өлкөлүк инвестициялардын көлөмү 190,3 млн долларды түзүп, өлкөнүн экономикасына тартылган түз чет өлкөлүк инвестициялардын жалпы көлөмүнүн 21,5%ын түздү.
Өткөн жылдын ушул эле мезгилине салыштырмалуу тоокен тармагына тартылган инвестициялардын көлөмү эки эседен ашыкка, тактап айтканда 203,5%га өстү.
