Ак-Суу айылында 10 гектар жер өнөр жай максатындагы категорияга өткөрүлдү
МинКаб Чүй облусунун Ак-Суу айылындагы 10 гектар жер тилкесин айыл чарба багытындагы жерлер категориясынан өнөр жай, транспорт, байланыш, энергетика жана башка максаттагы жерлер категориясына өткөрүү тууралуу чечимди бекитти.
Жер тилкеси мамлекеттик менчикте болуп, тамчылатып жана жамгырлатып сугаруу системалары үчүн пластмасса буюмдарын чыгаруучу завод куруу максатында пайдаланылат. Чечим Чүй облусундагы Президенттин ыйгарым укуктуу өкүлчүлүгүнүн жана райондук мамлекеттик администрациянын корутундулары эске алынып кабыл алынган.
Жергиликтүү өз алдынча башкаруу органдарына шаар куруу документтерин иштеп чыгып бекитүү, жер эсебине тиешелүү өзгөртүүлөрдү киргизүү, жер тилкесин катуу максаттуу пайдаланууну камсыз кылуу, ошондой эле мыйзамдарда белгиленген тартипте айыл чарба өндүрүшүнүн жоготууларын жана алынбай калган пайданы компенсациялоо тапшырылды.
Мындан тышкары, санитардык нормаларды сактоо, сейсмикалык туруктуулук жана инженердик камсыздоо талаптарын аткаруу, жер үстүндөгү сууларды буруп кетүү, ал эми тарыхый-маданий мурас объектилери табылган учурда археологиялык көзөмөлдү уюштуруу милдеттендирилди.
Документте белгиленгендей, эгерде жер тилкеси максаттуу пайдаланылбаса, ал мамлекет тарабынан кайтарып алынып, баштапкы абалына келтирилиши мүмкүн.
