Зомбулуктан жабыркаган балдар борбору жаңыланып жатат
Бишкек шаарында Зомбулуктан жана катаал мамиледен жабыркаган балдарга жардам көрсөтүү борборунун имаратында капиталды ремонттун айрым бөлүктөрү бүткөрүлгөнүн шаар мэриясынын басма сөз кызматы билдирди.
Вице-мэр Виктория Мозгачёва социалдык өнүгүү департаментинин директору Айзада Жунусова менен бирге борборго барып, жумуштардын жыйынтыктары менен таанышышты.
Бул борбор 11 жылдан ашуун убакыттан бери кыйын абалда калган балдарга социалдык, психологиялык жана юридикалык жардамды акысыз көрсөтүп келет. Борборго, ошондой эле зомбулукка кабылган балдар, мүмкүнчүлүгү чектелген жана өнүгүүсүндө өзгөчөлүктөрү бар балдар менен алардын үй-бүлөлөрү кайрылышат.
Визиттин жүрүшүндө муниципалитеттин өкүлдөрү жаңылануунун жыйынтыктары менен таанышышты. Борбордо кабинеттер толук оңдолуп, пандустар орнотулду, подъезд жолдору, паркинг аймагы жана кире бериш тобу жабдылды. Ошондой эле жаңы эмерек, жабдуулар сатып алынып, балдар үчүн оюн жана консультациялык бөлмөлөр ачылган.
Жумуштар 2025-жылга карата социалдык өнүгүү объекттерин капиталдык ремонттоо жана куруу планынын алкагында жүргүзүлгөн. Борбор Карасаева көчөсү, 73-дарек (№14 орто мектептин чыгыш канаты) боюнча жайгашкан. Жаңыланган соң, мекеме балдар жана алардын үй-бүлөлөрү үчүн жеткиликтүүлүк, коопсуздук жана ыңгайлуулук талаптарына жооп берет.
