Ош шаарынын башкы архитектурасынын кызматкерлери кармалды

Ошто курулуш стандарттарын одоно бузуу менен курулган бир катар курулуш долбоорлору аныкталганын УКМКдан билдиришти. Атайын кызматтын маалыматына караганда, курулуш компаниялары унаа токтотуучу жайлар боюнча жалган маалымат берип, Ош архитектурасы ал долбоорлорду мыйзамсыз бекитип турган. 

Курулуш компаниялары пайда көрүү үчүн унаа токтотуучу жайлардын ордуна коммерциялык имараттарды куруп салышкан. 

Ош архитектурасынын кызматкерлери шаарды иретке келтирүүнүн ордуна, курулуш компанияларынын өкүлдөрү менен алдын ала келишим түзүшкөн. 

Натыйжада Ош шаарынын аймагында шаар куруу чөйрөсүндөгү мыйзамдардын системалуу түрдө бузулушу байкалууда, бул объекттерди куруу мөөнөттөрүн создуктурууга, үлүшчүлөрдүн нааразычылыгына, транспорттук абалдын олуттуу начарлашына, жол тармагында тыгындардын пайда болушуна жана шаардык инфраструктурага кошумча жүк келтирүүгө алып келет.

Чогултулган материалдардын негизинде УКМК тарабынан кылмыш иши козголуп, анын алкагында Ош шаарынын башкы архитекторунун биринчи орун басары Т.Ы.К. жана архитектура боюнча адиси Т.З.М. кармалып, убактылуу кармоочу жайга киргизилди.

Учурда кылмыш ишин иликтөөнүн алкагында Ош шаарындагы шаар курулушу чөйрөсүндөгү коррупциялык мүнөздөгү кызматтык кылмыштарды аныктоо боюнча иш-чаралар уланууда.