"Ала-Арча" мамлекеттик паркынын кирешеси 3 жылда 262,7 млн сомго чейин жеткен
2022–2025-жылдар аралыгында "Ала-Арча" мамлекеттик жаратылыш паркынан түшкөн киреше 65,8 млн сомдон 262,7 млн сомго чейин, башкача айтканда дээрлик төрт эсеге өскөнүн Президенттин иш башкармалыгы маалымдады.
Маалыматка ылайык, кирешенин кескин өсүшү санариптештирүү, башкаруунун ачык-айкындуулугун жогорулатуу жана туристтик инфраструктураны активдүү өнүктүрүү менен байланыштуу. Акыркы жылдары парк аймагында төмөнкү жаңы объектилер пайда болду:
- коттедждер жана мейманкана;
- мончо комплекстери;
- ресторандар жана кеңейтилген эс алуу (рекреациялык) кызматтары.
2024-жылы "Жылуу булактар" комплекси парктын балансына өткөрүлүп, бул экологиялык жана ден соолукту чыңдоочу туризмди өнүктүрүү мүмкүнчүлүктөрүн кеңейтти. Жакынкы убакта аркан жолду ишке киргизүү күтүлүүдө, ошондой эле родельбан курулушу уланып жатат. Аркан жолдун узундугу 1 миң метрди түзөт.
2025-жылдын 1-майынан тартып "Ала-Арча" паркынын аймагына кадимки автотранспорттун кирүүсүнө тыюу салынган. Аймакта жөө жүрүүгө жана электромобилдер менен гана жүрүүгө уруксат берилет. Бийлик өкүлдөрү бул чара тейлөөнүн сапатын жакшыртып, коноктордун коопсуз жана ыңгайлуу эс алуусуна шарт түзгөнүн белгилешет.
