Ак-Суу айыл аймагында 10 гектар кайрак жер завод куруу үчүн трансформацияланат
Министрлер кабинети Чүй облусундагы жер тилкесин айыл чарба багытындагы жерлер категориясынан өнөр жай багытындагы жерлер категориясына өткөрүү тууралуу чечим кабыл алды. Тиешелүү токтомго 2026-жылдын 2-февралында кол коюлган.
Сөз Москва районунун Ак-Суу айыл аймагынын аймагында жайгашкан, мамлекеттик менчиктеги 10 гектар кайрак айдоо жери тууралуу болуп жатат.
Жер тилкеси тамчылатып жана жамгырлатып сугаруу системалары үчүн пластик буюмдарын чыгаруучу завод куруу максатында өнөр жай жерлери категориясына өткөрүлдү.
Документке ылайык, Москва райондук мамлекеттик администрациясы шаар куруу документациясын иштеп чыгып, бекитүүнү, жер-кадастрдык материалдарга өзгөртүүлөрдү киргизүүнү жана жер тилкесинин максаттуу пайдаланылышын камсыз кылууга тийиш. Мындан тышкары, айыл чарба өндүрүшүнүн жоготуулары үчүн компенсация төлөө, санитардык-эпидемиологиялык нормаларды, сейсмикага каршы талаптарды жана суу агызуу чараларын сактоо каралган.
Токтомдо ошондой эле мүмкүн болгон тарыхый-маданий мурас объектилерин коргоо талаптары жана жер тилкеси пайдаланылбай калган же максатсыз колдонулган учурда аны кайра алуу мүмкүнчүлүгү белгиленген.
Чечим расмий жарыяланган күндөн тартып 9 күн өткөндөн кийин күчүнө кирет.
