Бишкектеги курулуш компанияларына 400 миң айып пул салынды
Бишкек шаары боюнча Мамлекеттик архитектуралык-курулуш көзөмөл башкармалыгы рейддик иш-чараларды жүргүзүп төмөнкү курулуш объекттеринде бир катар мыйзам бузуулар аныктады.
- Н. Коперник көчөсү, 26/1 дарегинде жайгашкан 9 кабаттуу турак жай комплекси;
- Ж. Баатыр көчөсү, 50а дарегиндеги 14 кабаттуу турак жай үйү.
"Аталган объекттерде курулуш нормаларынын (“Курулуш өндүрүшүн уюштуруу”) талаптары жана “Шаар куруу жана архитектура жөнүндө” мыйзамдын жоболору бузулгандыгы аныкталган.
Мындан тышкары, объекттин бирдиктүү паспорту жок болуп, коопсуздук техникасынын талаптары сакталган эмес", — деп маалымдады министрлик.
Минкурулуштун маалыматы боюнча, курулуш компанияларына карата акт түзүлүп, аныкталган мыйзам бузууларды жоюу боюнча милдеттүү көрсөтмө берилди. Ошондой эле 400 миң сом өлчөмүндө айып пул салынды.
Курулуш министрлигинин маалымат базасына ылайык:
Н. Коперник көчөсү, 26/1 дарегиндеги "Светлый" турак жай комплексинин подрядчысы — "Памир Строй" ЖЧКсы, буйрутмачысы — "ATA STROY" ЖЧКсы, долбоорлоочусу — "Ренн Магна Бэйсис" ЖЧКсы.
Ал эми Ж. Баатыр көчөсү, 50а дарегиндеги "Сирень" турак жай комплекси "Партнер Р-Групп" ЖЧКсына таандык. Бул объектте компания буйрутмачы жана подрядчы катары иш алып барат. Долбоорлоочу — "Партнёр проект" ЖЧКсы.
