Фучик көчөсүндөгү үйлөр бузулат: тургундарга жаңы батирлер сунушталды
Президенттин тапшырмасынын алкагында Бишкек шаарында Фучик көчөсүндө жайгашкан үйлөрдүн тургундары менен жумушчу жолугушуу өткөрүлдү. Бул тууралуу мэриядан билдиришти.
Бишкек шаарынын мэри Айбек Джунушалиев белгилегендей, аталган имараттар акыркы эки жылдан бери Курулуш, архитектура жана турак жай-коммуналдык чарба министрлигинин көзөмөлүндө болуп, учурда алардын техникалык абалы начарлап, авариялык деп табылган.
Жолугушууда тургундарды турак жай менен камсыз кылуу маселеси каралып, аларга Мамлекеттик ипотекалык компания аркылуу батирлер сунушталаары айтылды. Төлөмдүн айырмасын жеңилдетилген шарттарда төлөө мүмкүнчүлүгү каралган.
Мындан тышкары, мүлктөрдү баалоо жүргүзүлүп, ар бир ээси менен жеке иш алып барылып, тиешелүү келишимдер түзүлөт. Коммерциялык жайлар да турак жайлар менен бирдей шартта каралат.
Имараттар бузулуп, андан кийин жер тилкеси муниципалдык менчикке өткөрүлөт. Келечекте бул аймакты пайдалануу боюнча кошумча чечимдер кабыл алынат.
Белгиленгендей, долбоорго №18, 20 жана 22-үйлөр кирип, жалпысынан 350гө жакын батир камтылган. Анын ичинен 38 батир муниципалитеттин менчигинде.
