Бишкек шаардык мэриясы: Муниципалдык мүлктү сатууга тыюу салынат
Бишкек шаарынын мэриясы ижарадагы муниципалдык мүлккө карата укуктарды ижарачылар менен келишим түзүү аркылуу сатып алууга жол берилбестигин билдирет.
Маалыматка ылайык, муниципалитеттин жана жарандардын кызыкчылыктарын коргоо максатында муниципалдык мүлктү убактылуупайдалануу укугун үчүнчү жактарга өткөрүп берүүгө чектөө киргизилди.
Ошондой эле муниципалдык мүлктү финансылык-кредиттик мекемелерге күрөөгө коюуга тыюу салынганын маалымдайт.
Бул чаралар муниципалдык мүлктү пайдаланууга байланыштуу талаштуу жагдайлардын келип чыгышын алдын алууга, соттук териштирүүлөргө жол бербөөгө, ошондой эле муниципалдык менчикке ар кандай укуктук оорчулуктардын жаралышына бөгөт коюуга багытталган.
Ижарачылар муниципалдык мүлктү пайдалануу укугун үчүнчү жактарга өткөрүп берүү же сатуу учурлары аныкталды.
Бишкек шаарынын мэриясы мындай бүтүмдөрдүн тарабы болуп саналбайт жана жаңы пайдалануучу менен ижара келишиминин мөөнөтүн узартууга кепилдик бербейт.
Мындай укуктарды сатып алган адамдар ижара келишимин узартуудан баш тартуу тобокелдигин өздөрү көтөрүшөт.
Бишкек шаарынын мэриясы жарандарды сак болууга жана мыйзамдуу негиздер болбосо, ижарачылардан муниципалдык мүлккө карата укуктарды сатып алууга байланыштуу эч кандай келишимдерди түзбөөгө чакырат.
