31 жыл ичинде эгемендүү Кыргызстандын киши башына ИДПсы эки эсеге гана өстү
Эртең, 31-август күнү, Кыргызстан Эгемендүүлүк күнүн белгилейт. Көз карандысыздыктын 31 жыл аралыгында Экономикалык маанилүү көрсөткүч болгон Ички дүң продуктунун (ИДП) киши башына карата көлөмү кандай өзгөргөнүн Economist.kg байкап көрдү.
1991-жылы киши башына ИДП 576 долларды түзсө, 2021-жылы 1276 долларды түздү. Мындай көрсөткүчтөр Дүйнөлүк банктын маалыматында айтылат.
Эгемендүүлүккө жеткенден тартып Кыргызстандын экономикасы 1999-жылы абдан начарлап (ИДП адам башына 258 доллар), бир нече жолу өсүп, COVID-19 пандемиясы дүйнөнү каптаганга чейин 2019-жылы эң жогорку чекитке жеткен (киши башына 1374 доллар).
Бирок жалпысынан көз чаптырсак, 30 жылда өлкөнүн экономикасы эки эсеге гана өстү деген жыйынтык чыгарса болот.
Салыштырсак, ошол эле мезгилде Казакстандын экономикасы төрт эседен ашык өскөн (2013-жылы эң жогорку көрсөткүчү киши башына 13 891 доллар болгон). Өзбекстандын экономикасы бул жылдар ичинде 2.5 эсеге, Тажикстандыкы 1.7 эсеге өскөн.
