Бишкекте мигранттардын финансылык сабаттуулугу тууралуу китептин бет ачары болду
Эл аралык мигранттар күнүнө карата Улуттук банк жана Эмгек, социалдык камсыздоо жана миграция министрлиги Эл аралык миграция уюму (ЭМУ) менен биргеликте эмгек мигранттарынын жана алардын үй-бүлө мүчөлөрүнүн жыргалчылыгын жогорулатууга багытталган биргелешкен демилгени сунушташты.
ЭМУнун изилдөөлөрүнө ылайык, акча которуулар мигранттардын үй-бүлөлөрүнүн 41%ы үчүн негизги киреше булагы болуп саналат.
"Оор эмгек менен табылган каражаттар күнүмдүк керектөөлөрдү гана камсыздабастан, мигранттардын жана алардын үй-бүлөлөрүнүн келечектеги каржылык жыргалчылыгы үчүн иштеши маанилүү", — деп белгилешти уюштуруучулар.
Улуттук банктын өкүлдөрү калктын каржылык маданиятын жогорулатуу банктын стратегиялык милдеттеринин бири экенин белгилешти. Жаңы модуль жарандарды акча которууларда банктык каналдарды коопсуз пайдаланууга гана эмес, депозиттер жана аманат эсептери аркылуу "каржылык коопсуздук жаздыгын" (резерв) түзүүгө да үйрөтөт. Бул өз кезегинде каржылык туруктуулукка түздөн-түз таасир этет.
Эмгек министрлигинде миграция тууралуу чечим ойлонулган жана тең салмактуу болушу керек деп эсептешет: адам бардык оң жана терс жактарын алдын ала баалап, бул маселени үй-бүлөсү менен талкуулап, Кыргызстанда калып иштөө мүмкүнчүлүгүн же чет өлкөгө чыгуу вариантын карап көрүшү зарыл.
Каржылык сабаттуулук боюнча модулдар төмөнкүлөргө жардам берет:
- Чет өлкөгө кетүүгө кеткен реалдуу чыгымдарды эсептеп, жолго чыга электе эле карызга батпоого;
- Каражат топтоо үчүн ишенимдүү каржылык инструменттерди тандоого;
- Топтолгон капиталды Кыргызстанда чакан жана орто бизнести ачууга багыттоого.
