Жаңы жылга караган түнү саат 00.00дө кыз төрөлдү

Бир сутка ичинде Кыргызстанда 365 төрөт катталды, анын ичинде төрт эгиз төрөт болгонун Саламаттык сактоо министрлигинин басма сөз кызматы билдирди.

Ведомствонун маалыматына ылайык, Жалал-Абад облустар аралык бириккен клиникалык ооруканасында эки эгиз, Бишкек шаардык перинаталдык борборунда бир эгиз жана Ош шаардык төрөт үйүндө дагы бир эгиз жарык дүйнөгө келген.

Ыкчам маалыматтарга караганда, 31-декабрдын саат 08:00үнөн 1-январдын саат 08:00үнө чейин республика боюнча жалпысынан 177 уул бала жана 190 кыз бала төрөлгөн. Тогуз аялга кесарево операциясы жасалган.

Ал эми 1-январга караган түнү, тактап айтканда саат 00:00дөн 00:10го чейин, 11 ымыркай (беш кыз жана алты уул) төрөлгөн.

2026-жылдын биринчи ымыркайы Иссык-Ата районундагы жалпы дарыгердик практика борборунда так саат 00:00дө төрөлгөн. Ал 3 килограмм 915 грамм салмактагы кыз бала.

Эң көп төрөттөр Жалал-Абад облусунда (81), Ош шаарында жана Ош облусунда (68), ошондой эле Бишкек шаарында (69) катталган.