Эң көп пластик чогулткан мектеп "Таза шаар" сынагынын жеңүүчүсү болот
Жогорку Кеңеш спикери Марлен Маматалиев бүгүн Бишкек шаарындагы мектеп директорлору менен жолугушууга катышып, 1-мартта баштала турган "Таза шаар" сынагын жарыялады.
ЖКнын басма сөз кызматы билдиргендей, кампаниянын алкагында жеңүүчү болгон мектептерге ири байгелер берилет. Пластик калдыктарын чогултуу боюнча сынак 2026-жылдын 1-мартынан 1-майына чейин өтөт. Эң көп пластик чогулткан окуу жай жеңүүчү деп табылат.
Марлен Маматалиев долбоордун маанилүүлүгүн белгилеп, бул демилге президент Садыр Жапаров тарабынан көтөрүлгөн экологиялык демилгелердин уландысы болорун айтты.
"Акыркы жылдары президент айлана-чөйрөнү коргоо, климаттын өзгөрүшүн жөнгө салуу жана жашыл экономиканы өнүктүрүү багытында ири демилгелерди көтөрдү. Учурда көптөгөн иш-чаралар уюштурулууда. “Таза шаар” сынагы ошол демилгелердин уландысы болуп, борбор шаарыбыздын экологиясын жакшыртууга салым кошот деп ишенем", — деди ал.
Спикер сынакка катышкан мектептерге ийгилик каалап, мындай демилгелерди аймактарга да жайылтуу керектигин белгиледи.
Долбоор Жогорку Кеңеш, Бишкек шаарынын мэриясы, Дене тарбия жана спорт мамлекеттик агенттиги жана Кыргызстандын Кызыл Ай коому тарабынан колдоого алынган.
