Кытай 1110 миллиардери менен кайрадан дүйнөдөгү эң бай өлкө болду

Кытай кайрадан дүйнөдөгү миллиардерлери көп өлкө болгонун South China Morning Post басылмасына таянып, Kazinform билдирди.

Hurun Global Rich List рейтингине ылайык, Кытайда миллиардерлердин саны 1110 адамга жетти. Бул дүйнө боюнча катталган 4020 миллиардердин эң чоң үлүшү болуп саналат. Бир жыл ичинде өлкөдө алардын саны 287 адамга көбөйгөн.

Адистер мунун негизги себеби - фондулук рыноктун өсүшү жана жасалма интеллект технологияларынын тез өнүгүшү менен байланыштырышат.

Жаңы миллиардерлердин катарына технология тармагында иштеген ишкерлер да кошулган. Алардын арасында MiniMax компаниясынын негиздөөчүсү Ян Цзунце бар. Анын байлыгы 3,6 млрд доллар деп бааланууда. Андан кийин 1,2 млрд доллар байлыгы менен Knowledge Atlas Technology (Zhipu) компаниясынын жетекчилеринин бири Лю Дэбин турат.

Жалпысынан дүйнөдө жасалма интеллект тармагына байланышкан 114 миллиардер бар. Алардын 46сы быйылкы рейтингге биринчи жолу кирген.

Дүйнөдөгү эң бай адамдардын алдыңкы үчтүгүнө Илон Маск, Жефф Безос жана Ларри Пейж кирет. Биринчи орунда Илон Маск турат, анын байлыгы 792 млрд доллар деп бааланат. Экинчи орунда 300 млрд долларлык байлыгы менен Жефф Безос. Ал эми үчүнчү орунда 281 млрд доллар байлыгы менен Ларри Пейж турат.

Белгилей кетсек, Илон Маск тарыхта байлыгы 700 млрд доллардан ашкан биринчи адам болду.

Ал эми шаарлар боюнча алып караганда, миллиардерлер эң көп жашаган шаар – бул Нью-Йорк. Бул шаарда 146 миллиардер бар. Андан кийинки орундарда Шенжен, Шанхай, Пекин жана Лондон турат.

Дүйнөдөгү миллиардерлердин орточо жашы 65 жаш деп эсептелет.