Кыргызстанда 30 жыл ичинде "Баатыр эне" орденин 42 миң 936 эне алган
1996-жылдан бери "Баатыр эне" ордени менен 42 миң 936 эне сыйланганын депутат Медер Чотонов бүгүн Жогорку Кеңештин жыйынында билдирди. Анда "Баатыр эне" ордени менен сыйланган энелердин балдарына мамлекеттик билим берүү жеңилдиктерин берүү тууралуу токтом долбоору талкууланды.
Анын айтымында, алардын ичинен 31 миң 302 баатыр эне учурда пенсияда.
"Бул статус үчүн пенсияга кошумча төлөм 1 миң сомду түзөт. Мындан тышкары, пенсияга чыга элек 75 баатыр эне бар. Алар ай сайын 3 миң сом жөлөк пул алышат. Ушуну менен мамлекет тарабынан көрсөтүлгөн колдоо аяктайт. Ошондуктан баатыр энелерди жана алардын балдарын колдоону каалап жатабыз", — деди Медер Чотонов.
Ал акыркы жылдары өлкөдө төрөлгөн ымыркайлардын саны 20–30 миңге кыскарганын белгиледи.
"Белгилүү болгондой, демография менен экономика түздөн-түз байланыштуу. Бул токтом республикада демографиялык кризистин алдын алууга багытталган", — деп кошумчалады Медер Чотонов.
