Балдарды пайдаланып мыйзамсыз алтын жана акча алып чыгуу аракетине бөгөт коюлду
Ташкент облусундагы “Навои” бажы бекетинде бир аял ымыркай баласынын жалаягына 200 грамм салмактагы эки алтын куйманы аткезчилик жол менен алып өтүүгө аракет кылгандыгы үчүн кармалды. Бул тууралуу Өзбек Республикасынын бажы комитетинен кабарлашты.
Баласынын жалаягына катылган алтындан сырткары, кармалган аялдын жанында бажы көзөмөлүнө декларацияланбаган - 70 гр салмактагы зер буюмдар табылган. Алдын ала эсептөөлөр боюнча, аткезчилик жол менен алынып келинген алтын буюмдардын жалпы баасы 450 млн сумга бааланууда.
Билдирүүгө караганда, мындан сырткары дагы бир чет элдик аял 14 жаштагы кызынын кийиминин астына 40 миң $ акчаны аткезчилик жол менен жашырып, өлкөдөн алып чыгууга аракет кылып, Бажы комитети тарабынан дароо токтотулган.
Жогорудагы келтирилген 2 окуя боюнча атайын иликтөөлөр уланууда.
Ушуга байланыштуу бажы комитети жашы жете электерди кылмыштарга аралаштыруу - оордотуучу жагдай деп эсептелерин жана кылмышка катышуу учурдагы мыйзамдарга ылайык кылмыш жоопкерчилигине алып келерин эскертти.
