Россияда айдоочусу жок поезд сыноодон өтүп жатат
Россияда төртүнчү деңгээлдеги автоматташтыруу системасы менен жабдылган “Ласточка” электр поездин сынай башташты. Сыноолор Москвадагы борбордук шакек темир жолунда (МЦК) өткөрүлүп жатат. Бул тууралуу РИА-Новости маалымдады.
Билдирүүгө караганда, жаңы технологиянын өзгөчөлүгү — поездди башкаруу үчүн анын ичинде машинисттин болушу талап кылынбайт. Поезд өз алдынча ылдамдап, тормоз басып, эшиктерди ачып-жабат. Анын ишин диспетчердик борбордогу оператор алыстан көзөмөлдөйт.
Иштеп чыгуучулардын маалыматына караганда, бир оператор бир убакта төрт поездге чейин көзөмөлдөй алат. Зарыл болгон учурда ал поездди алыстан токтотуп, эшиктерди, кондиционерди жана башка системаларды башкара алат.
Система жолдогу тоскоолдуктарды жана белгилерди автоматтык түрдө таанып, кооптуу жагдай жаралса поездди өзү токтото алат. Иштеп чыгуучулар бул технология ачык темир жол инфраструктурасында жүргөн поезддер үчүн дүйнөдө теңдеши жок экенин белгилешүүдө.
Айдоочусуз поезддердин сыноодон өтүшү Россияда транспортту автоматташтыруу багыты күчөп жатканын көрсөтөт. Буга чейин Москвада айдоочусуз таксилерди сыноо жана ишке киргизүү боюнча долбоорлор башталган.
