Улгайган аялдын алдамчыларга алдынышына полиция кызматкери бөгөт койду
Казакстандын Петропавловск шаарында полиция кызматкери 69 жаштагы пенсионер аялдын 2,7 млн теңгесин алдамчыларга которуп жиберишине бөгөт койду. Бул тууралуу 24KZ маалымдады.
Билдирүүгө караганда, алдамчылар аялга алгач телефон чалып, өздөрүн домофон орнотуучу компаниянын кызматкерлери катары тааныштырышкан. Алар жабдуулар алмаштырылгандыктан, подъездге кирүү үчүн электрондук ачкычы иштебей калганын айтып, аны калыбына келтирүү үчүн SMS аркылуу келген кодду айтууну суранышкан.
Кийин алдамчылар өздөрүн банктын кызматкерлери катары тааныштырып, аялдын банктагы эсептерине белгисиз адамдар кирүүгө аракет кылып жатканын билдиришип, аманаттарын сактап калуу үчүн акчасын тез арада банкоматтан чыгарып, “коопсуз эсепке” которуу керектигин айтышкан.
Ишенчээк аял Петропавловск шаарындагы соода үйлөрүнүн бириндеги банкоматка келип, 2,7 млн теңгесин которууга даярданып турган. Алдамчылар аны менен телефон аркылуу байланышын үзбөй, эгер өзүн полиция кызматкери катары тааныштырган адам келсе, ага ишенбөөнү эскертишкен.
Ошол учурда банкоматтын жанынан жарандык кийимчен полиция кызматкери сырдуу аялды байкап калган. Ал кызматтык күбөлүгүн көрсөтүп, кырдаалды түшүндүрүүгө аракет кылганда, аял алгач анын сөзүнө ишенген эмес.
Полиция кызматкери аялга алдамчылардын схемасын түшүндүрүп, акыры акчаны которбоого көндүргөн. Натыйжада пенсионердин 2,7 млн теңге өлчөмүндөгү топтогон акчасы сакталып, материалдык чыгым келтирилген эмес.
