"Кыргыз темир жолу" жүк ташууну санарип форматка өткөрүүдө
Санариптештирүү темир жол тармагын өнүктүрүүнүн маанилүү багыты болуп саналат. Бул алкакта "Кыргыз темир жолу" УК" мамлекеттик ишканасы жүк ташуу процессин автоматташтырууга багытталган жаңы санариптик системаны киргизүүдө.
Учурда ишканада жүк ташуулардын бардык этаптарын бириктирген "Ташуу процессинин бирдиктүү модели" программасы этап-этабы менен ишке киргизилип жатат. Система жүк ташуунун бардык процесстерин бир платформада жүргүзүүгө мүмкүндүк берет. Анын алкагында Турксиб бекетинде вагондорду кабыл алуудан тартып, андан ары өткөрүп берүүгө чейинки операциялар автоматташтырылууда.
Жүк жөнөтүүчүлөр жана жүк алуучулар үчүн railway.gov.kg сайтында Жеке кабинеттер ишке киргизилген. Алар аркылуу кардарлар арыздарын онлайн тариздеп, алардын статусун көзөмөлдөй алышат жана темир жол менен аралыктан иш алып барышат.
Жаңы системанын киргизилиши документтерди тариздөө убактысын эки эсеге кыскартууга, каталардын тобокелдигин азайтууга жана иштин ачыктыгын жогорулатууга шарт түзүүдө.
Программанын негизги артыкчылыктары:
- вагондордун токтоп туруусун эсепке алуу жана жыйымдарды автоматтык эсептөө;
- бекеттик отчетторду автоматтык түзүү жана кирешелерди көзөмөлдөө;
- кол менен маалымат киргизүүдөн улам жаралган каталарды жоюу;
- кайталанма операцияларды автоматташтыруу;
- кардарларды тейлөөнүн сапатын жогорулатуу жана процедураларды тездетүү.
