Ашууларда каттам үзгүлтүксүз: жол тазалоо иштери жүргүзүлүүдө
12-мартка карата өлкө аймагындагы автоунаа жолдорунда абал туруктуу. Бардык унаалар үчүн чектөөлөр жок, жергиликтүү жана эл аралык маанидеги автожолдордо каттам үзгүлтүксүз уланууда. Бул тууралуу Транспорт жана коммуникациялар министрлигинин маалымат кызматынан билдиришти.
Учурда төмөнкү негизги автожолдордо жана ашууларда жолдор ачык:
- Ош–Сары-Таш–Эркечтам автожолунун Чыйырчык, Талдык, Тон-Мурун ашуулары
- Ала-Бука–Жаңы-Базар–Кировка автожолунун Чапчыма ашуусу
- Бишкек–Ош автожолунун Төө-Ашуу, Ала-Бел, Көк-Бел ашуулары жана Боом капчыгайы
- Мырзаке–Кара-Кулжа–Алайкуу автожолу
- Бишкек–Нарын–Торугарт автожолунун Долон, Чар, Ак-Бейит, Туз-Бел, Кубакы, Кызыл-Бел ашуулары
- Тараз–Талас–Суусамыр автожолунун Өтмөк ашуусу
- Түп–Кеген автожолу
Транспорт жана коммуникациялар министрлигине караштуу жол тейлөө ишканаларынын кызматкерлери жалпы пайдалануудагы автожолдордо кар тазалоо, тайгакка каршы инерттик материалдарды чачуу жана кар күрткүлөрүн тазалоо иштерин күнү-түнү жүргүзүп жатышат.
Жол тейлөө кызматтары жолдордун коопсуздугун камсыздоо жана каттамдардын үзгүлтүксүз болушу үчүн күчөтүлгөн режимде иш алып барууда.
