Кыргызстанда айдоочулук күбөлүктү 3 саатта алуучу долбоор иштелип жатат
Кыргызстанда айдоочулук күбөлүктү тездетилген тартипте алуу мүмкүнчүлүгүн караган жаңы мамлекеттик кызмат иштелип жатканын "Унаа" мамлекеттик мекемесинен билдиришти.
Маалыматка караганда, акыркы убакта жарандардан айдоочулук күбөлүктү берүү мөөнөтүн кыскартуу боюнча кайрылуулар үзгүлтүксүз түшүүдө. Буга байланыштуу "Транспорт каражаттарын башкаруу укугуна айдоочулук күбөлүктү шашылыш берүү" мамлекеттик кызматынын стандартынын долбоору даярдалды.
Учурда документтердин толук топтому болгондо жана сынактарды ийгиликтүү тапшырган учурда, айдоочулук күбөлүк стандарттык тартипте төрт жумушчу күндүн ичинде берилет. Ал эми жаңы долбоордо альтернативдүү варианттар каралган — арыз ээсинин тандоосу боюнча документти үч сааттын ичинде, бир жумушчу күндө же эки жумушчу күндө алууга болот.
Белгиленгендей, шашылыш кызматты киргизүү процессти жарандар үчүн ыңгайлуу кылып, кезектерди кыскартат жана кайра кайрылуулардын санын азайтат. Бул кызмат өзгөчө аймактардын тургундары жана убактысы чектелген жарандар үчүн актуалдуу болмокчу.
Азыркы учурда долбоор макулдашуу баскычында турат. Шашылыш берүү үчүн төлөмдүн өлчөмү бардык чыгымдарды эсепке алуу менен "Кызмат" мамлекеттик мекемеси менен биргеликте аныкталат. Андан соң тариф Монополияга каршы жөнгө салуу кызматына кароого жиберилет.
Мекеме мындай тажрыйба дүйнөнүн бир катар өлкөлөрүндө ийгиликтүү колдонулуп жатканын баса белгиледи. Бул кызматты киргизүү мамлекеттик сервистердин жеткиликтүүлүгүн, процедуралардын ачыктыгын арттыруу жана калкка кызмат көрсөтүүнүн сапатын жакшыртуудагы кезектеги кадам катары каралууда.
Кошумчалай кетсек, бул демилге министрлер кабинетинин 2025-жылдын 27-ноябрындагы №760 токтому менен бекитилген "Квалификациялык сынактарды кабыл алуу жана айдоочулук күбөлүктөрдү берүү эрежелеринин" 32-пунктуна ылайык ишке ашырылат.
