Аба ырайы кескин өзгөрөт: Жолдордо сак болуңуз!
Аба ырайынын өзгөрүшүнө байланыштуу үстүбүздөгү жылдын 16–19-апрель күндөрү Кыргызстандын тоолуу аймактарында кар көчкү түшүү коркунучу жана кооптуу тилкелерде жер көчкү жүрүү ыктымалдыгы жогору бойдон калууда. Бул тууралуу Транспорт жана коммуникациялар министрлиги маалымдап, жол коопсуздугун камсыздоо максатында бардык тиешелүү чаралар көрүлгөнүн билдирди.
Министрликтин маалыматына ылайык, Жол тейлөө ишканалары керектүү техникалар жана жабдыктар менен толук камсыздалган. Учурда бардык ашууларда кар тазалоочу атайын техникалар, жүктөгүчтөр жана башка механизмдер даяр абалда турат.
Мындан тышкары, жолдорду иштетүү үчүн инерттик материалдардын — туз жана кум аралашмаларынын жетиштүү көлөмү алдын ала камдалган.
Транспорт жана коммуникациялар министрлиги айдоочуларды жол эрежелерин так сактоого чакырып, унаалардын ортосунда кеминде 500 метр коопсуз аралыкты кармоо зарылдыгын эскертет.
Айдоочулардан аба ырайынын шарттарын эске алып, өзгөчө этият болуу суралат.
