Бишкекте жаңы автобустардын үлгүлөрү көрсөтүлдү
Бүгүн Бишкек шаарынын мэриясынын алдында борбор калаанын мэри Айбек Джунушалиевге Zhong Tong жана Yutong маркасындагы эки автобустун жаңы үлгүлөрү тааныштырылды. Бул тууралуу муниципалитеттен билдиришти.
Бул автобустар Бишкек шаарынын конуштарын тейлөө үчүн пландалган 625 даана коомдук транспорт сатып алуу долбоорунун алкагында сунушталды.
Маалыматка ылайык, Zhong Tong үлгүсүндөгү автобус газ мотордук күйүүчү май менен иштейт, ал эми Yutong маркасындагысы электр энергиясы менен жүрөт. Узундугу 8,9 метр болгон бул автобустар төмөн полдуу болуп, кондиционер системалары менен жабдылган. Ошондой эле алар майыптыгы бар жарандар үчүн ыңгайлаштырылган.
Белгиленгендей, жакынкы күндөрү Бишкек шаарына дагы бир катар автобус үлгүлөрү алып келинип, аларга салыштырма талдоо жүргүзүлөт.
Учурда сунушталган транспорт каражаттарына комплекстүү сыноо иштери жүрүүдө. Анын жыйынтыгында корутунду даярдалып, жеткирүүчүлөрдү тандоо жана сатып алынуучу автобустардын техникалык мүнөздөмөлөрү боюнча акыркы чечим кабыл алынат.
Эске салсак, Бишкек шаарынын мэриясы жалпы 625 даана чакан көлөмдөгү автобусту сатып алууну пландап жатат. Жаңы коомдук транспорт негизинен тар көчөлөрү бар конуштарды тейлөө үчүн пайдаланылат.
