Кыргызстанда быйыл 1 500 чакырымдан ашык жол куруу пландалууда
Транспорт жана коммуникациялар министрлигинде 2025-жылы аткарылган иштер жана 2026-жылга карата пландар каралган жыйын өттү. Бул тууралуу Өкмөттүн басма сөз кызматынан билдиришти.
Жыйын Министрлер Кабинетинин Төрагасынын орун басары Эрлист Акунбековдун жетекчилиги алдында өтүп, анда министр Талантбек Солтобаев тармактагы негизги көрсөткүчтөр тууралуу маалымат берди.
Анын айтымында, акыркы жылдары жол тармагын каржылоо эки эсеге өсүп, 2021-2025-жылдары өлкө боюнча жалпы 3684 чакырым жол курулуп жана оңдолгон. Анын ичинен 2025-жылы эле 1545 чакырым жол пайдаланууга берилген.
2026-жылга карата министрлик 1500 чакырымдан ашык жолду куруу жана оңдоо милдетин алган. Учурда республика боюнча 30га жакын ири долбоор ишке ашырылууда.
Жыйында ошондой эле санариптештирүү багыты, бюджеттик каражаттарды өздөштүрүү жана алдыдагы негизги милдеттер талкууланды.
Эрлист Акунбеков быйыл өтө турган ири эл аралык иш-чараларды — ШКУ саммитин жана Дүйнөлүк көчмөндөр оюндарын эске салып, жол тармагындагы иштерди өз мөөнөтүндө жана сапаттуу бүтүрүүнү тапшырды.
Мындан тышкары, ал президент Садыр Жапаров тарабынан көтөрүлгөн аймактардагы жол көйгөйлөрүн ыкчам чечүүнү, ошондой эле жайкы туристтик мезгилге карата жолдорду даярдоону күчөтүүнү белгиледи.
