Талас шаарында 40 чакырым жол курулуп башталды
Талас шаарында жалпы узундугу 40 чакырымды түзгөн ички жолдорду куруу жана оңдоо иштери башталды. Анын алкагында 12 көчөдө толук кандуу курулуш иштери жүрүүдө. Бул тууралуу президенттин Талас облусундагы ыйгарым укуктуу өкүлү Эрмат Жумаев өзү маалымат таратты.
Бүгүн, 20-апрелде Эрмат Джумаев, Талас шаарынын вице-мэри Айбек Көрөбаев жана тиешелүү жергиликтүү бийлик өкүлдөрү жол куруу иштеринин жүрүшү менен жеринде таанышышты.
“Жол куруу иштерин жеке көзөмөлүмө алып, алардын сапаттуу жана өз мөөнөтүндө бүткөрүлүшүнө өзгөчө көңүл бурабыз. Анткени алдыда өлкөбүздүн эгемендүүлүк күнүн салтанаттуу белгилөө иш-чаралары Талас облусунда өткөрүлөт”, - деди Жумаев.
Курулуш иштери болжол менен 4 айга созулат. Учурда биринчи этапта 12 көчөдө жалпы 28 чакырым жолду куруу иштери активдүү жүрүүдө. Экинчи баскыч менен дагы 7 көчөдө курулуш иштери башталмакчы. Бүгүнкү күндө долбоорду ишке ашырууга 5 подряддык компания тартылып, бекитилген графикке ылайык иш алып барышууда.
Белгилей кетсек, Кыргызстандын эгемендүүлүгүнүн 35 жылдыгын салтанаттуу белгилөө иш-чаралары быйыл Талас облусунда өткөрүлөт.
