Чек арадан өтүү жеңилдейби? Кыргызстан менен Беларусь жаңы чечимдерди карады
Бүгүн Шанхай кызматташтык уюмунун иш-чараларынын алкагында Транспорт жана коммуникациялар министринин орун басары Бактылуу Аскар уулу баштаган делегация Беларусь Республикасынын Транспорт жана коммуникациялар министринин орун басары Сергей Дубина жетектеген өкүлдөр менен жолугушту. Бул тууралуу ведомстводон билдиришти.
Жолугушууда тараптар транспорт тармагын санариптештирүү, автожол өткөрүү пункттарын өнүктүрүү жана мамлекеттик чек арадан өтүү процедураларын жөнөкөйлөтүү маселелерин талкуулашты.
Айрыкча чек арадан өтүү процессин ылдамдатууга багытталган электрондук системаларды киргизүү темасына өзгөчө көңүл бурулду. Беларусь тарап электрондук товардык-транспорттук коштомо кагаздар (e-CMR) системасын киргизүү боюнча өз тажрыйбасы менен бөлүшүүгө даяр экенин билдирди. Ошондой эле e-Permit системасын ишке ашырууда жетишкендиктери тууралуу маалымат берилди.
Мындан тышкары, тараптар темир жол инфраструктурасын өнүктүрүү маселелерин, анын ичинде “Кытай – Кыргызстан – Өзбекстан” темир жол долбоорун ишке ашыруу багытын да талкуулашты.
Жолугушуу транспорт тармагындагы кызматташууну кеңейтүүгө жана тажрыйба алмашууга багытталганы белгиленди.
