Жети-Өгүздө талапка жооп бербеген асфальт буздурулду
Ысык-Көл облусунун Жети-Өгүз районундагы Ак-Дөбө айылынын тургундары тарабынан жол курулушунун сапатына байланыштуу видео кайрылуу келип түшкөн. Бул тууралуу Курулуш, архитектура жана турак жай-коммуналдык чарба министрлигинен билдиришти.
Анын негизинде Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Ысык-Көл регионалдык башкармалыгы тарабынан ыкчам текшерүү жүргүзүлдү.
Текшерүү Ак-Дөбө айылынын Сарт-Аке көчөсүндө капиталдык оңдоодон өтүп жаткан жолдо жүргүзүлдү. Долбоордун жалпы узундугу 2,2 чакырымды түзөт. Учурда анын 1 чакырым бөлүгүндө жолдун бир тарабына асфальт төшөлгөнү аныкталды.
Ошол эле учурда жолдун 200 метр бөлүгүндө асфальттын сапаты жана калыңдыгы долбоордук талаптарга жооп бербегени белгиленип, аталган участок буздурулду. Аныкталган кемчиликтер боюнча подрядчы уюмга тиешелүү чаралар көрүлүп, иштерди толугу менен долбоордук ченемдерге ылайык кайра аткаруу милдети жүктөлдү.
Учурда демонтаждалган бөлүк жана жүрүп жаткан курулуш иштеринин сапаты министрлик тарабынан катуу көзөмөлгө алынганы маалымдалды.
