Акча алмашуудагы мыйзам бузуулар үчүн валюта рыногундагы бир катар оюнчуларга чара көрүлдү
Кыргыз Республикасынын мыйзамдарынын жана Улуттук банктын ченемдик укуктук актыларынын талаптарын бузууга жол бергендиги үчүн айрым алмашуу бюролоруна жана жеке жактарга карата чара көрүлдү. Бул тууралуу Улуттук банктын басма сөз кызматынан кабарлашты.
Билдирүүгө караганда, Бишкек шаарындагы 2 акча алмыштуруу бюросу жана Кант шаарындагы 1 акча алмаштыруучу жай мыйзам бузган. Ушуга байланыштуу алардын лицензиялары май айынын аягына чейин убактылуу токтотулду.
Мындан сырткары, КРнын мыйзамдарынын жана КРнын Улуттук банкынын ченемдик укуктук актыларынын талаптарын бузууга жол бергендиги үчүн, Бишкек шаарындагы 3 алмашуу бюросуна айып пул тагылып, ар бирине 55 000 сом өлчөмүндө айып салынды.
Ал эми Улуттук банктын тиешелүү лицензиясы жок, Бишкек шаарында нак чет өлкө валютасы менен алмашуу операцияларын жүргүзгөндүгү үчүн 1 кыргыз жаранына (Ж.Н.Р.) 17 500 сом өлчөмүндө айып пул салынды.
Алмашуу бюросу - бул КРнын Улуттук банкынын лицензиясына ылайык жүзөгө ашырылган нак чет өлкө валютасы менен алмашуу операцияларын жүргүзүү үчүн юридикалык жак тарабынан түзүлгөн атайын жабдылган пункт болуп саналат. Акча алмашуу ишмердүүлүгү менен атайын лицензияга ээ болгон юридикалык жактар гана алектене алышат.
