Кыргызстанда алмашуу бюролорунун жүгүртүү каражаттарынын минималдуу өлчөмү жогорулайт

Кыргызстандагы нак чет өлкө валютасы менен алмашуу операцияларын жүргүзүү укугуна лицензия берүү тартиби катаалдашууда.  Улуттук банктын башкармалыгы жаңы түзүлгөн алмашуу бюролору, кошумча алмашуу бюролору жана сезондук негизде ишкердигин жүргүзгөн алмашуу бюролору үчүн жаңы минималдуу жүгүртүү каражаттарынын талаптарын белгиледи. 

КРнын Улуттук банкынын  ченемдик укуктук актыларына алмашуу бюролорун жана микрофинансылык уюмдарды лицензиялоо маселелери боюнча өзгөртүүлөрдү киргизүү тууралуу токтому 13-майда кабыл алынган. Жаңы эрежелер 2026-жылдын 1-июнунан тартып күчүнө кирет.

Ага ылайык, алмашуу бюролору үчүн жүгүртүү каражаттарынын минималдуу өлчөмү төмөнкүдөй белгиленди:

·       Бишкек, Ош шаарларынан тышкары алмашуу бюролору - 3 млн сом;

·       Бишкек жана Ош шаарларындагы алмашуу бюролору - 5 млн сом;

·       Жайгашкан жерине карабастан, сезондук алмашуу бюролору - 1 млн сом.

Азыркы тапта иштеп жаткан алмашуу бюролору үчүн Улуттук банк талаптарды акырындык менен жогорулатып жатат. Мисалы, Бишкек, Ош шаарларынан тышкары алмашуу бюролору үчүн жүгүртүү каражаттарынын минималдуу өлчөмү жана аны түзүү мөөнөттөрү төмөнкүдөй белгиленди:

·       2026-жылдын 1-октябрына чейин кеминде - 1 млн сом;

·       2028-жылдын 1-октябрына чейин кеминде - 2 млн сом;

·       2030-жылдын 1-октябрына чейин кеминде - 3 млн сом.

Ал эми Бишкек жана Ош шаарларындагы алмашуу бюролорунун жүгүртүү каражаттары төмөнкү көрсөткүчтө болушу шартталат:

·       2026-жылдын 1-октябрына чейин кеминде - 2 млн сом;

·       2028-жылдын 1-октябрына чейин кеминде - 3 млн сом;

·       2030-жылдын 1-октябрына чейин кеминде - 5 млн сом.

Мындан сырткары, жайгашкан жерине карабастан, сезондук негизде ишкердигин жүргүзгөн алмашуу бюролору үчүн 2026-жылдын 1-октябрына чейин – 1 млн сомдон кем эмес өлчөмдө көбөйтүүгө милдеттүү.

Улуттук банктын алмашуу бюролорунун  19-майга карата абалы боюнча реестрине ылайык, Кыргызстанда 892 алмашуу бюросу иштеп жатат.