Улуттук банктын төрагасы өлкөнүн коммерциялык банктарынын өкүлдөрү менен жолугушту

Улуттук банктын төрагасы Алмаз Бакетаев өлкөнүн коммерциялык банктарынын өкүлдөрү менен ачык диалог өткөрдү.  Улуттук банктын валюта рыногунун чыныгы үнүн угуу аракети жолугушуунун негизги максаты болду.

Бул тууралуу Улуттук банктын басма сөз кызматынан кабарлап, аталган  ишчарага чакырылгандар банктык кызматтарды өнүктүрүү боюнча актуалдуу көйгөйлөрдү жана аларды чечүү боюнча сунуштарды түздөн-түз талкуулоо үчүн келгендигин маалымдады.

Билдирүүгө караганда, бир нече саатка созулган жолугушууда, жыйындын катышуучулары банк тармагындагы актуалдуу маселелерди, анын ичинде Улуттук банктын талаптарын, кызматтарды санариптештирүүнү, керектөөчүлөрдүн укуктарын коргоону, жаңы технологиялык чечимдерди киргизүүнү жана Улуттук банк менен рыноктун ортосундагы өз ара аракеттенүүнүн натыйжалуулугун жогорулатуу маселелери талкууланды. 

Диалог жөнгө салуучу менен банктык коомчулуктун ортосундагы мындан аркы конструктивдүү өз ара аракеттенүүнүн негизин түздү. Тараптар республиканын финансылык системасынын туруктуу өнүгүүсү үчүн биргелешкен чечимдерди иштеп чыгууга даяр экендиктерин ырасташты.