Кыргызстанда эл аралык төлөмдөр QR аркылуу жеткиликтүү боло баштады
"Элкарт Мобайл" тиркемесин колдонуучулар үчүн эми эл аралык QR-төлөмдөрдү жүргүзүү жеткиликтүү болуп калды. “Банктар аралык процессинг борбору” ЖАК (БАПБ) КРУБ жана Alipay+менен биргеликте «Элкарт Мобайл» колдонуучулары үчүн эл аралык төлөмдөрдү QR аркылуу жүргүзүүнү ишке киргизди.
Азырынча бул сервис Казакстан жана Малайзия өлкөлөрүндө гана жеткиликтүү болгону менен бир айдан кийин дүйнөнүн 60тан ашык өлкөсүндө дагы жеткиликтүү болушу күтүлүп жатат. Эми колдонуучулар чет өлкөдө да көнүп калгандай эле QR-код аркылуу түз эле "Элкарт Мобайл" тиркемеси менен төлөм жүргүзө алышат.
Адистердин айтымында бул сервистин жардамы менен мындан кийин акча алмаштыруучу жайларды издөөнүн, накталай акча көтөрүп жүрүүнүн, чет элдик электрондук капчык ачуунун жана кошумча тиркемелерди жүктөөнүн кереги жок болот.
2026-жылдын 16-июнунан тартып бул кызмат Кытайда да иштей баштайт. Ал эми июнь айынын аягына чейин Alipay+ тармагы аркылуу кызмат 60тан ашык өлкөгө жайылтыла тургандыгын БАПБнан маалымдашты.
Билдирүүгө караганда, QR-код аркылуу төлөм жүргүзүүдө Кыргызстандын жарандары үчүн комиссия алынбайт, конвертация тиркемедеги курс менен жүргүзүлөт жана төлөм түздөн-түз «Элкарт Мобайл» аркылуу ишке ашырылат.
БАПБ ЖАКнун Башкармалыгынын төрагасы Алтымыш Туратбековдун айтымында бул жаңычылык - Кыргызстандын санариптик экосистемасынын өнүгүүсүндөгү жаңы этап жана улуттук төлөм системасынын эл аралык деңгээлге чыгышы болуп саналат.
“Биз бул долбоордун үстүндө 2025-жылдын сентябрынан тарта иштеп баштаганбыз жана кыска убакыттын ичинде эл аралык интеграцияны ишке ашыра алдык”- деп белгиледи, Алтымыш Туратбеков.
Эми Кыргызстандыктар үчүн көнүмүш болуп калган ELQR чет өлкөдө да иштөөсүнө шарт түзүлдү.
