Анвар Абдраев: Кыргызстандын банктары дүйнөлүк банктардан артта калган жок
Кыргызстандын банк сектору санариптик кызмат көрсөтүүлөрдүн деңгээли боюнча дүйнөдөгү алдыңкы банктардан кем калбайт. Бул тууралуу Кыргызстан банктар бирикмесинин" президенти Анвар Абдраев BIFF2026 Эл аралык финансы форумунун жүрүшүндө билдирди.
Анын айтымында, өлкөдө банк кызматтары толугу менен санарип форматка өтүп, жарандар мобилдик тиркемелер аркылуу бардык негизги операцияларды жүргүзүп жатышат.
“Кыргызстандын банк сектору дүйнөлүк банктардан эч нерсеси менен артта калган жок. Биз санариптик форматка өтүп жатабыз. Бардык каражаттарыбызды ушул уюлдук телефондо сактайбыз. Жада калса төлөм карталарын да колдонбой калдык. Технология эң сонун, баары абдан жакшы өнүгүп жатат. Менимче, биздин банк тармагыбыз дүйнөлүк банктар менен бирдей деңгээлде келе жатат, башка региондорду айтпай эле коелу”, — деди Абдраев.
Абдраевдин айтымында, BIFF2026 форуму быйыл 12-жолу өткөрулуп жатат. ушул жылдар аралыгында аталган ишчара мазмуну менен гана эмес, географиялык жактан да өзгөрдү. Ага ылайык, ишчарага дүйнө жүзүнүн бардык булуң бурчунан эксперттер келип катышып, актуалдуу маселелердин алкагында ойлору жана тажрыйбалары менен бөлүшүп турушат.
“Бүгүнкү күндө талкууланып жаткан негизги темалар бул - жаңы санариптик технологиялар жана киберкоопсуздук болуп саналат. Казакстан, Өзбекстан, Кыргызстан, Америка, Түркия, Кытай жана башка жерлерде болсун, бул көйгөй баарыбызда бирдей бар. Биздин форумдун негизги максаты - санариптик технологияларды ишке ашыруунун оптималдуу жолдорун жана аларды коргоонун варианттарын табуу болуп саналат”, - деп билдирди "Кыргызстан банктар бирикмесинин" башчысы.
Билдирүүгө караганда, жыл сайын BIFF Эл аралык финансы форум ар башка темада өткөрүлүп турат. Буга чейин кредиттөө, лизинг, ислам принциптеринде каржылоо сыяктуу маселелер талкууланса, бүгүнкү күндө негизги тема - жаңы санариптик технологиялар жана киберкоопсуздук болуп жатат.
