КРнын банк сектору жыл башынан бери 6 974,3 млн сом таза киреше алган
2026-жылдын 31-мартына карата абал боюнча Кыргызстанда 24 коммерциялык банк жана алардын 306 филиалы иштеп турган. Алардын алтоосу ислам банк иши жана каржылоо принциптери боюнча кызмат көрсөтөт. Улуттук банктын банк секторунун өнүгүү тенденциялары тууралуу расмий маалыматына ылайык, жыл башынан бери банк сектору 6,9 млрд сом таза киреше тапкан.
Бул көрсөткүч былтыркы ушул мезгилге салыштырмалуу жогору болгондугу белгиленүүдө. Билдирүүгө караганда, банк секторунун жалпы активдери 23 % өсүп, 1 489,4 млрд сомго жеткен.
Ал эми кредиттик портфелдин көлөмү 540,1 млрд сомду түзүп, жыл башынан бери 6,5 % көбөйгөн.
Тармактар боюнча берилген кредиттер
өнөр жайына - 17,1 млрд сом (26,9 % өсүү);
айыл чарбасына - 55,2 млрд сом (1,4 % өсүү);
соода чөйрөсүнө 124,7 млрд сом (7,6 % өсүү);
курулушка 18,7 млрд сом (1,0 % өсүү);
ипотекага 54,3 млрд сом (16,4 % азаюу);
керектөө үчүн 198,6 млрд сом (16,6% өсүү);
ж.б боюнча 71,6 млрд сом түзгөн (3,1 % өсүү).
Эң көп кредит соода тармагына жана керектөө муктаждыктарына берилген.
Ислам принциптери боюнча каржылоонун көлөмү да өсүп, 21,6 млрд сомго жеткен. Бул өткөн жылдын аягына салыштырмалуу 12,3% көп.
Ал эми банк секторунун депозиттик базасы 916,5 млрд сомду түзүп, негизинен юридикалык жактардын жана мамлекеттик органдардын депозиттеринин өсүшүн камсыздаган.
Банк секторунун кардарларынын депозиттик базасы
юридикалык жактардын депозиттери 444,8 млрд сом (7,5% өсүү);
жеке адамдардын депозиттери 272,9 млрд сом (2,0% азаюу);
бийлик органдарынын депозиттери 89,3 млрд сом (35,0% өсүү);
резидент эместердин депозиттери 102,1 млрд сом (3,8% өсүү);
ж.б ФКУнын депозиттери 7,4 млрд сом (21,4% азаюу).
Мындан тышкары, банк секторунда долларлашуу деңгээли төмөндөп жатканы байкалган. Кредиттердин долларлашуусу 18%, депозиттердики 31,3% түзгөн.
Ошондой эле Улуттук банк банк системасынын капитал жетиштүүлүгү жана ликвиддүүлүк көрсөткүчтөрү белгиленген нормативдерден кыйла жогору деңгээлде сакталып жаткандыгын билдирүүдө.
