“Элдик банк” Жогорку Нарын ГЭС каскадын курууга насыя берет
Президент Садыр Жапаров 2-июнда, Кыргызстандагы аманат ишмердигинин 100 жылдыгын белгилөөгө жана “Элдик банктын” жаңы имаратынын ачылышына арналган салтанаттуу иш-чарага катышты. Бул тууралуу президенттин басма сөз катчысы Аскат Алагөзов билдирди.
“Бүгүн өлкөбүздүн бүтүндөй банк системасы үчүн маанилүү күн болуп турат. Бир саамдан соң биз эки маанилүү окуяны — Кыргызстандагы аманат ишмердигинин 100 жылдыгын белгилөө менен бирге “Элдик банктын” жаңы имаратын ачканы турабыз", - деди Мамлекет башчысы.
"Бул бири-бирине төп келген эки окуя ары символикалуу, ары тарыхый мааниге ээ. Бүгүнкү күндө бир кылымдык жол арбыткан аманат ишмердигинин улантуучусу дал ушул “Элдик банк” болуп саналат”, - деп билдирди С.Жапаров.
“Элдик банк” улуттук маанидеги инфратүзүмдүк, энергетикалык, транспорттук жана социалдык долбоорлорду каржылоого активдүү катышат. Банк өлкөбүздүн эң ири энергетикалык долбоорлорунун бири – Жогорку Нарын ГЭС каскадын курууга, транспорттук инфратүзүмдү өнүктүрүү долбоорлоруна, авиация тармагын өнүктүрүүгө, өлкөнүн билим берүү жана медициналык мекемелерин колдоого насыя бөлмөкчү.
“Урматтуу мекендештер, “Элдик банк” Кыргызстандын тарыхында биринчи жолу эл аралык капитал рынокторуна чыкканын өзгөчө белгилегим келет. Жогорудагы видеотасмада көргөнүңүздөрдөй, ушул жылы “Элдик банк” Лондон фондулук биржасында 500 миллион доллар өлчөмүндөгү еврооблигацияларды ийгиликтүү жайгаштырды”, - деп кошумчалады Мамлекет башчысы.
