КРУБ: чет өлкөдөгү комбанктардын филиалдарынан берилген кредиттерге талаптар өзгөрдү

Улуттук банк Башкармасы 29-майда коммерциялык банктардын чет өлкөлөрдөгү ишмердүүлүгүн жөнгө салган бир катар ченемдик актыларга өзгөртүүлөрдү киргизди. Чечим банктык көзөмөлдү күчөтүүгө жана кыргыз банктарынын чет мамлекеттердеги филиалдарынын ишин жөнгө салууну тактоого багытталган.

Негизги өзгөрүүлөрдүн бири – чет өлкөлөрдөгү филиалдар тарабынан берилген кредиттерди классификациялоо тартибине байланыштуу. Буга чейин чек ара аркылуу берилген кредиттер негизинен тобокелдиги жогору активдер катары бааланып келсе, эми белгилүү шарттар аткарылган учурда аларды “канааттандырарлык актив” катары эсептөөгө уруксат берилет.

Мындай шарттарга кредит берилген өлкөнүн жогорку эл аралык кредиттик рейтинги, кредиттин ошол өлкөнүн аймагында берилип жана тейлениши, ошондой эле карыз алуучунун кирешеси кредит алынган валютада болушу кирет.

Ошондой эле капиталдын жетиштүүлүгүн эсептөө боюнча талаптар да жаңыланды. Чет өлкөлөрдөгү филиалдардын ишин камсыздоо үчүн алынган айрым программалык камсыздоолор жана санариптик чечимдер белгилүү шарттарда капиталдан толук алып салынбайт. Бул банктардын чет өлкөлөрдө иштөөсүнө байланышкан технологиялык чыгымдарды эске алууга мүмкүндүк берет.

Мындан тышкары, жогорку рейтингге ээ өлкөлөрдө иштеген компанияларга берилген кредиттер үчүн тобокелдик деңгээлин аныктоонун жаңы тартиби киргизилди. Бирок мындай кредиттер боюнча төлөмдөр 30 күндөн ашык кечиктирилсе же реструктуризацияланса, алар жогорку тобокелдик категориясына өткөрүлөт.

Улуттук банк бул өзгөртүүлөр чет өлкөлөрдөгү филиалдардын ишин өнүктүрүүгө, ошол эле учурда банк секторундагы тобокелдиктерди көзөмөлдөөнү сактоого багытталганын белгилейт.

Токтом расмий жарыялангандан кийин 15 күндөн соң күчүнө кирет.