Улуттук банк милдеттүү камдар боюнча талапты бузган банкка айып салды
Кыргыз Республикасынын Улуттук банкы милдеттүү камдардын көлөмүнүн минималдуу чектүү деңгээлин аткаруу боюнча талаптарды сактабагандыгы үчүн бир коммерциялык банкка айыптык төлөм салды. Бул тууралуу Улуттук банктын басма сөз кызматынан кабарлашты.
Маалыматка ылайык, мыйзам бузуу 2026-жылдын 18-майынан 14-июнуна чейинки базалык мезгилде аныкталган. Анын негизинде коммерциялык банкка 1 361,49 сом өлчөмүндө айып салынган.
Милдеттүү камдар – бул коммерциялык банктар Улуттук банктагы эсептеринде сактоого милдеттүү болгон каражат болуп саналат. Бул талап банк системасынын туруктуулугун камсыздоого жана ликвиддүүлүк тобокелдиктерин азайтууга багытталган.
Белгилей кетсек, Улуттук банктын 2026-жылдын 1-июнуна карата маалыматына ылайык, Кыргызстанда 26 коммерциялык банк жана алардын филиалдары иш алып барууда.
