Улуттук банк ЖМК өкүлдөрү үчүн окутуучу семинар өткөрдү
Өлкөнүн финансылык, экономикалык жана банктык өнүгүү жаатындагы өзгөрүүлөрү, келечек пландары жана көйгөйлөрү тууралуу окутуучу ишчара, кече Улуттук банкта өткөрүлдү. Башкы банктык жөнгө салуучу өлкөдөгү алдыңкы жалпыга маалымдоо каражаттарынын өкүлдөрү үчүн окутуучу семинар уюштурду.
Иш-чара журналисттерге Улуттук банктын негизги иш багыттары, ролу жана функциялары тууралуу маалымдоо максатында уюштурулган.
Окутуучу семинарды Улуттук банктын төрагасынын орун басары Азат Козубеков ачып, ЖМК менен кызматташуу жөнгө салуучунун ишиндеги негизги артыкчылыктардын бири экендигин белгиледи.
Анын айтымында, маалымат каражаттары менен ачык жана үзгүлтүксүз өз ара аракеттенүү коомдук ишенимди бекемдөөгө жана Улуттук банктын чечимдерин коомчулукка түшүнүктүү жеткирүүгө өбөлгө түзөт.
Семинардын жүрүшүндө Улуттук банктын түзүмдүк бөлүмдөрүнүн жетекчилери валюта рыногунун иштөө принциптери, акча-кредит саясаты, банк системасынын туруктуулугун камсыздоо боюнча жүргүзүлүп жаткан ишчаралар тууралуу айтып беришти. Журналисттердин көңүлүн айрыкча финансылык кызматтарды санариптештирүү, жарандарды алдамчылык аракеттерден коргоо чаралары кызыктырды.
Мындан сырткары ишчаранын алкагында, Улуттук банктын нумизматикалык музейине саякат жасалып, андан журналисттер улуттук валютанын жаралуу этаптары, нумизматикалык коллекциялардын түрлөрү менен таанышышты.
Улуттук банк мындай жолугушуулар аркылуу медиа өкүлдөрүнүн финансылык сектор боюнча билим деңгээли жогорулап, коомчулукка так, ишенимдүү маалымат жеткирүүгө көмөк көрсөтөрүнө ишеним артууда.
