Түрк мамлекеттер уюмунун Борбордук банктар кеңешинин жыйыны болду
4-5-июнь күндөрү КРнын Улуттук банкынын төрагасы Алмаз Бакетаев Азербайжан Республикасынын Баку шаарында өткөн Түрк мамлекеттер уюмунун Борбордук банктар кеңешинин жыйынына катышты.
Улуттук банктын маалыматына ылайык, жыйындын жүрүшүндө А.Бакетаев акча-кредит саясаты жана глобалдык тобокелдиктер сакталып турган шарттарда финансылык туруктуулукту камсыздоо маселелери боюнча баяндама жасады. Ошондой эле, санариптик каржылык экосистемаларды өнүктүрүү боюнча ыкмаларды сунуштады.
Мындан тышкары, жыйындын алкагында Азербайжан Республикасынын премьер-министри Асадов Али Идаят оглы ТМУга мүчө жана байкоочу мамлекеттердин борбордук (улуттук) банктарынын башчылары менен жолугушту. Жолугушууда уюмга мүчө мамлекеттердин ортосундагы ар кандай багыттар боюнча кызматташтыктын келечеги талкууланды.
Анын жыйынтыгында катышуучулар коммюникеге кол коюшту. Документте ТМУнун борбордук банктарынын акча-кредит саясаты, финансылык туруктуулук жана төлөм системалары чөйрөсүндө өз ара аракеттенүүнү активдештирүүгө даярдыгы чагылдырылган.
