Улуттук банк виртуалдык активдер боюнча операцияларга көзөмөлдү күчөтүүнү сунуштоодо
Кыргыз Республикасынын Улуттук банкы коомдук талкууга коммерциялык банктардын ички көзөмөл системасына байланыштуу өзгөртүүлөрдүн долбоорун чыгарды.
Документтин негизги максаты — виртуалдык активдер (криптовалюталар жана башка санариптик активдер) менен жүргүзүлгөн операцияларда акчаны адалдоого, терроризмди каржылоого жана массалык кыргын салуучу куралдарды жайылтууну каржылоого каршы талаптарды күчөтүү болуп саналат.
Долбоорго ылайык, банктар виртуалдык активдер менен байланышкан кардарлар жана операциялар боюнча тобокелдиктерди кеңири баалап, көзөмөл жүргүзүүгө милдеттүү болот. Атап айтканда, кардардын жана анын контрагенттеринин маалыматын текшерүү, активдердин келип чыгышын аныктоо, операциялардын мыйзамдуулугун талдоо талаптары күчөтүлөт.
Мындан тышкары, банктарга виртуалдык активдер боюнча операцияларды көзөмөлдөө үчүн блокчейн-аналитика инструменттерин колдонууга мүмкүнчүлүк берүү сунушталууда. Ошондой эле санкциялык тизмелерге байланыштуу капчыктарды, даректерди жана транзакцияларды аныктоого өзгөчө көңүл бурулат.
Долбоордо жогорку тобокелдик жараткан белгилер да көрсөтүлгөн. Алардын катарына жөнгө салынбаган виртуалдык актив кызмат көрсөтүүчүлөрүнүн катышуусу, ээси белгисиз капчыктарды колдонуу, транзакциялардын изин жашырууга багытталган сервистерди пайдалануу жана кардардын ишмердүүлүгүнө дал келбеген операциялар кирет.
Улуттук банк ошондой эле маалымат жетишсиз болгон же активдердин келип чыгышын аныктоо мүмкүн болбогон учурларда банктарга мындай операцияларды жүргүзүүдөн баш тартуу укугун берүүнү сунуштоодо.
Маалыматта белгиленгендей, өзгөртүүлөр виртуалдык активдер рыногунун өнүгүшүнө, санариптик финансылык технологиялардын кеңири жайылышына байланыштуу иштелип чыккан. Документте эл аралык стандарттар, анын ичинде акчаны адалдоого каршы күрөшүү боюнча Financial Action Task Force (FATF) уюмунун сунуштары эске алынганы белгиленет.
Токтом долбоору коомдук талкуу үчүн Улуттук банктын расмий сайтына жана коомдук талкуулардын мамлекеттик порталына жайгаштырылды.
