Улуттук банк валюта рыногуна кезектеги интервенция менен чыкты
КРнын Улуттук банкы 8-июнда кезектеги валюталык интервенциясын жүргүзүп, валюта рыногунда 170,2 млн $ сатты. Бул 2026-жылдын башынан берки жетинчи интервенция болуп саналат. Анын жыйынтыгында Улуттук банктын жыл башынан бери саткан валютасынын жалпы көлөмү 1 млрд 63,65 млн $ жетти.
Улуттук банктын маалыматына ылайык, сатыкка чыккан каражаттын ичинен 76,7 млн $ бүтүмгө келишилген күндөгү эсептөөлөр менен болсо, 93,5 млн $ бүтүмгө келишилген күндөн башка күндөгү эсептөөлөр менен жүргүзүлгөн операцияларга туура келген.
Салыштыруу үчүн айтсак, 2025-жылы Улуттук банк валюта рыногунда жалпысынан сегиз интервенция жүргүзүп, 853 млн $ саткан. Өткөн жылдагы эң ири интервенция 22-декабрда болуп, анын көлөмү 179,5 млн $ түзгөн.
💡
Интервенция – бул Улуттук банктын валюта рыногундагы чет элдик валютанын жетишсиздигин жоюу жана улуттук валютанын курсун туруктуу кармоо максатында колдонулган негизги инструменттердин бири болуп саналат.
