Алдамчылыкка каршы күрөшүү талкууланды
Бүгүн Улуттук банк тарабынан алдамчылыкка каршы аракеттенүү боюнча ведомстволор аралык туруктуу жумушчу топтун кезектеги жыйыны болуп өттү. Бул тууралуу Улуттук банктын басма сөз кызматынан кабарлашты.
Билдирүүгө караганда, жыйынга Улуттук банктын, финансы-кредит мекемелердин, байланыш операторлорунун, ошондой эле мамлекеттик жана укук коргоо органдарынын өкүлдөрү катышышты.
Жолугушуунун жүрүшүндө катышуучулар мурдагы жыйындардын алкагында берилген тапшырмалардын аткарылышынын жыйынтыгын чыгарышып, жетишилген натыйжаларды, көйгөйлүү маселелерди ортого салышты.
Ошондой эле тараптар ыкчам өз ара аракеттенүүнү жолго салууга өзгөчө көңүл бурушуп, алдамчылыкка каршы күрөшүүнүн мындан аркы пландарын талкуулашты.
Эске салсак, Кыргызстанда онлайн жана телефондук шылуундардын көбөйүшүнө каршы күрөшүү максатында Улуттук банк, ИИМ жана УКМК баштаган Ведомстволор аралык жумушчу топ түзүлгөн. Алар мамлекеттик органдар, банктар, төлөм системалары жана байланыш операторлору менен биргеликте алдамчылыкты алдын алуу жана күрөшүү менен алектенишет.
