Улуттук банк лицензиясы жок валюта алмаштырган жаранга айып пул салды
КРнын Улуттук банкынын лицензиясы жок накталай чет өлкө валютасын алмаштыруу операцияларын жүргүзгөндүгү үчүн Кыргыз Республикасынын жаранына (К.А.Э.) 17 миң 500 сом өлчөмүндө айып пул салынды.
Улуттук банктын маалыматына ылайык, аталган жаранга айып пулду Баткен облусундагы Улуттук банктын өкүлчүлүгү мыйзам талаптарын бузгандыгы үчүн салган.
2026-жылдын 8-июнуна карата өлкөдө тийиштүү лицензияны алып, расмий негизинде иштеп жаткан 887 алмашуу бюросу бар. Чет өлкө валютасын сатып алуу жана сатуу боюнча операцияларды жүргүзүүгө ушул лицензияланган алмашуу бюролору гана укуктуу.
Улуттук банк жарандарды валюта алмаштыруу кызматтарын пайдаланууда лицензиясы бар расмий алмашуу бюролоруна гана кайрылууга чакырып, мыйзамсыз валюта алмаштыруу операциялары үчүн жоопкерчилик карала тургандыгын эскертет.
