Акча которуу кызматтарына карата талаптар катаалдашат
КРнын Улуттук банкы акча которуу системалары аркылуу которууларды жүргүзүү эрежелерине өзгөртүүлөрдү киргизүүнү сунуштап, тиешелүү токтом долбоорун коомдук талкууга чыгарды.
Маалыматка ылайык, документ акча которуу системаларынын операторлорунун ишин жөнгө салууну өркүндөтүүгө, алардын жоопкерчилигин күчөтүүгө жана көзөмөл механизмдерин жакшыртууга багытталган.
Долбоордо операторлор үчүн бир катар жаңы талаптар каралган. Ага ылайык, акча которуу системасынын операторлору жаңы кызматтарды же өнүмдөрдү ишке киргизүүдөн кеминде 15 жумуш күн мурда Улуттук банкка алдын ала маалымат берүүгө милдеттүү болот. Ошондой эле системанын иштөө эрежелерине өзгөртүү киргизүү пландалса, бул тууралуу дагы алдын ала кабарлоо талабы киргизилүүдө.
Мындан тышкары, акча которуу системаларынын операторлорунун реестринен чыгаруунун жаңы негиздери сунушталууда. Тактап айтканда, оператор катталгандан кийин 12 ай ичинде ишин баштабаса же бир жылдан ашык убакыт иш жүргүзбөсө, ошондой эле Улуттук банктын талаптарын бир жыл ичинде эки же андан көп жолу бузса, ал реестрден чыгарылышы мүмкүн.
Ошондой эле жалган маалымат берген же катталгандан кийин оффшордук аймактарга байланышкан өзгөрүүлөр аныкталган операторлорго карата да тиешелүү чараларды көрүү сунушталууда.
Долбоорго ылайык, акча которуу системаларынын операторлору квартал сайын жүргүзүлгөн операциялар жана катышуучулар тууралуу маалыматтарды Улуттук банкка электрондук форматта берип турууга милдеттендирилет.
Улуттук банк билдиргендей, сунушталган өзгөртүүлөр акча которуу системаларынын ачык-айкындуулугун камсыздоого, көзөмөлдү күчөтүүгө жана финансылык кызмат көрсөтүүлөрдүн коопсуздугун жогорулатууга багытталган.
Токтом долбоору боюнча сунуш-пикирлер 2026-жылдын 29-июнуна чейин кабыл алынат.
Токтом долбоору Улуттук банктын расмий интернет-сайтында «Улуттук банктын ченемдик актылары»/«Талкууга сунушталган долбоорлор» бөлүгүндө жана Кыргыз Республикасынын ченемдик укуктук актыларынын долбоорлорун коомдук талкуулоонун бирдиктүү порталында (koomtalkuu.gov.kg) жайгаштырылган.
