Насыялык бюролордо кредиттик маалыматты сактоо мөөнөтүн өзгөртүү сунушталууда
КРнын Улуттук банкы насыялык бюролордун ишин жөнгө салган эрежелерге өзгөртүүлөрдү киргизүү боюнча токтом долбоорун коомдук талкууга чыгарды.
Документ 2026-жылдын 29-апрелинде кабыл алынган «Насыялык маалымат алмашуу жөнүндө» мыйзамдагы өзгөртүүлөргө шайкеш келтирүү максатында иштелип чыккан.
Сунушталган өзгөртүүлөргө ылайык, кредиттик бюролордо сакталган терс кредиттик маалыматтардын мөөнөтү кыскартылат. Тактап айтканда, учурда терс кредиттик маалыматтар 5 жыл сакталса, жаңы тартип боюнча алар 2 жыл гана сакталат. Ал эми суммасы 30 миң сомдон ашпаган насыялар боюнча терс маалыматтар 1 жылдан кийин кредиттик таржымалдан чыгарылып салынат.
Ошол эле учурда оң кредиттик маалыматтарды сактоо мөөнөтү өзгөрүүсүз калып, 5 жыл бойдон сакталат.
Мындан тышкары, өзгөчө кырдаал же өзгөчө абал киргизилген учурларда жарандардын төлөмдөрдү өз убагында аткара албай калышына байланыштуу маалыматтарды терс кредиттик маалымат катары эсептебөө сунушталууда. Бул үчүн насыя алуучу тиешелүү арыз менен кайрылышы керек.
Адистердин баамында, сунушталган өзгөртүүлөр жарандардын кредиттик таржымалын тезирээк калыбына келтирүүгө шарт түзүп, финансылык кызматтарга жеткиликтүүлүктү кеңейтүүгө жардам берет.
Токтом долбоору Улуттук банктын расмий интернет-сайтында «Улуттук банктын ченемдик актылары» / «Талкууга сунушталган долбоорлор» бөлүгүндө жана Ченемдик укуктук актылардын долбоорлорун коомдук талкуулоонун бирдиктүү порталында (koomtalkuu.gov.kg/ru) жайгаштырылган.
Кызыкдар тараптар өз сунуштарын 2026-жылдын 29-июнуна чейин Улуттук банкка жөнөтө алышат.
