Улуттук банк дагы үч өлкөнүн валютасынын расмий курсун жарыялай баштайт
КРнын Улуттук банкы бахрейн динары, вьетнам донгу жана тай батын кыргыз сомуна карата расмий курсу аныкталуучу чет өлкө валюталарынын тизмесине киргизди. Бул тууралуу Улуттук банктан маалымдашты.
Билдирүүгө караганда, тиешелүү чечим Улуттук банк Башкармасынын 2026-жылдын 10-июнунда кабыл алынган токтому менен бекитилди. Ага ылайык, аталган үч валютанын расмий курсу мындан ары жума сайын аныкталып турат.
Учурда Улуттук банктын расмий сайтында дүйнөнүн 40 өлкөсүнүн валюталары боюнча маалымат жарыяланып келет. Алардын ичинен АКШ долларынын расмий курсу 2010-жылдын 1-январынан тартып күн сайын аныкталса, евро, орус рубли жана казак теңгесинин курсу 2012-жылдын 1-январынан баштап күн сайын эсептелүүдө. Ал эми кытай жэньминьби юанынын расмий курсу 2024-жылдын 1-сентябрынан тартып күн сайын жарыялана баштаган.
Калган чет өлкө валюталарынын расмий курстары жума сайын аныкталып турат.
Улуттук банк расмий курстар маалыматтык мүнөздө экенин белгилейт. Алар Улуттук банктын белгилүү бир курс боюнча чет өлкө валютасын сатып алуу же сатуу милдеттенмесин билдирбейт жана атайын эрежелерге ылайык эсептелет.
Жаңы өзгөртүү Кыргызстан менен Бахрейн, Вьетнам жана Таиланддын ортосундагы соода-экономикалык байланыштардын кеңейишине байланыштуу валюта рыногундагы маалыматтын жеткиликтүүлүгүн арттырууга багытталганы белгиленди.
