Улуттук банк тигүү тармагындагы ишкерлерге кредиттик жеңилдик берди
КРнын Улуттук банк Башкармасы 2026-жылдын 10-июнунда “Тигүү тармагынын ишкердик субъекттерине берилген кредиттерди кайра каржылоо маселелери жөнүндө” токтом кабыл алды.
Улуттук банктын маалыматына таянсак, документ тигүү тармагындагы ишкерлерди колдоо максатында иштелип чыккан.
Токтомго ылайык, Министрлер Кабинети тарабынан бекитилген долбоордун алкагында банктар жана башка финансы-кредит уюмдары тигүү тармагында иштеген ишкерлерге берилген айрым кредиттерди кайра каржылоодо жеңилдетилген шарттарды колдоно алышат.
Мындай мүмкүнчүлүк ишкер кеминде бир жылдан бери иштеп жаткан, салык жана камсыздандыруу төлөмдөрү боюнча карызы жок болсо, ошондой эле анын финансылык абалы кылдат талданган учурда берилет.
Мындан сырткары, кредит боюнча негизги карызды төлөө мөөнөтүн алты айга чейин жылдырууга жол берилет. Ал эми акыркы реструктуризация болгонуна кеминде бир жыл убакыт өткөн болушу керек.
Улуттук банктын маалыматына ылайык, кайра каржыланган мындай кредиттер “байкоого алынган актив” категориясына киргизилип, алар боюнча мүмкүн болгон тобокелдиктерди жабуу үчүн 5% өлчөмүндө резерв түзүлөт.
Документ расмий жарыяланган күндөн тартып күчүнө кирет жана 2027-жылдын 1-апрелине чейин колдонулат.
Токтом Улуттук банктын расмий сайтынын «Банк жөнүндө/Банк иши тууралуу мыйзамдар/Улуттук банк Башкармасынын токтомдору» бөлүгүндө жайгаштырылган.
