Мыйзам талаптарын бузган төлөм уюмуна 110 миң сом айып пул салынды
Кыргызстандын мыйзам талаптарын жана Улуттук банктын ченемдик укуктук актыларынын талаптарын бузууга жол бергендиги үчүн төлөм уюму жоопко тартылды.
Улуттук банктын маалыматына ылайык, Бишкек шаарында жайгашкан төлөм уюмдардын бирине жалпы суммасы 110 000 сом өлчөмүндө айып пул салынды.
2026-жылдын 12-июнуна карата Улуттук банктын лицензиясын алган төлөм уюмдарынын реестринде 57 төлөм уюму бар. Алардын баардыгы Бишкек шаарында жайгашкан. Улуттук банктын билдирүүсүндө төлөм уюму кандай талаптарды аткарбагандыгы үчүн жоопко тартылгандыгын ачыктаган жок.
Белгилей кетсек, төлөм уюмдары электрондук төлөмдөрдү жүргүзүү, акча которуу жана башка төлөм кызматтарын көрсөтүү багытында иш алып барышат. Алардын ишмердүүлүгүнүн мыйзам талаптарына шайкеш келиши - кардарлардын укуктарын коргоо жана төлөм системасынын туруктуулугун камсыздоо үчүн маанилүү.
Улуттук банк финансы рыногунун бардык катышуучулары мыйзам талаптарын жана жөнгө салуучу ченемдерди так сактоого милдеттүү экенин белгилеп, төлөм уюмдарынын ишмердүүлүгүнө туруктуу көзөмөл жүргүзүлүп турарын маалымдады.
